• កិច្ចព្រមព្រៀងពាណិជ្ជកម្មអាមេរិកខាងជើង នឹងមិនបន្តជាតំបន់ពាណិជ្ជកម្មគ្មានពន្ធទៀតទេ
• លោក Greer និយាយថា ពន្ធលើដៃគូតំបន់គឺចាំបាច់ដើម្បីកាត់បន្ថយឱនភាពពាណិជ្ជកម្ម
• អាមេរិក និងម៉ិកស៊ិក ចាប់ផ្តើមចរចាទ្វេភាគីស្តីពីមាតិកាតំបន់ និងពន្ធខាងក្រៅ
• ការសងសឹកផ្នែកពាណិជ្ជកម្មរបស់កាណាដា គឺជាបញ្ហាសម្រាប់អាមេរិក

វ៉ាស៊ីនតោន/ម៉ិកស៊ីកូស៊ីធី, Reuters — រដ្ឋបាល Trump មានបំណងបន្តរក្សាពន្ធលើការនាំចូលពីម៉ិកស៊ិក និងកាណាដា។ តំណាងពាណិជ្ជកម្មអាមេរិក លោក Jamieson Greer បាននិយាយនៅថ្ងៃអង្គារនេះ ខណៈអាមេរិកចាប់ផ្តើមចរចាដើម្បីកែប្រែកិច្ចព្រមព្រៀងពាណិជ្ជកម្មសេរីអាមេរិកខាងជើង (USMCA)។ លោក Greer បាននិយាយថា អាមេរិកមាន
“បញ្ហាពាណិជ្ជកម្មធ្ងន់ធ្ងរ” ជាមួយកាណាដា មុនពេលចាប់ផ្តើមការចរចាទ្វេភាគីជាមួយម៉ិកស៊ិក ដែលមិនរួមបញ្ចូលកាណាដា។

លោកបាននិយាយថា៖
“អាមេរិកនឹងនៅតែមានពន្ធ សូម្បីតែជាមួយប្រទេសដូចម៉ិកស៊ិក ឬប្រទេសផ្សេងៗនៅក្នុងតំបន់របស់យើង ក៏យើងនឹងរក្សាពន្ធដែរ ប្រសិនបើយើងនៅតែមានឱនភាពពាណិជ្ជកម្មធំ។” ការលើកឡើងនេះបង្ហាញថា កិច្ចព្រមព្រៀង USMCA ដែលមានអាយុ
6 ឆ្នាំ នឹងមិនបន្តជាកិច្ចព្រមព្រៀងពាណិជ្ជកម្មគ្មានពន្ធទៀតឡើយ។ លោកក៏បាននិយាយជាមុនទៅកាន់អ្នកដឹកនាំឧស្សាហកម្មនៅម៉ិកស៊ិកថា ពន្ធលើយានយន្ត និងដែកថែប នឹងបន្តមានក្រោម USMCA ថ្មី។

អ្នកចរចារបស់អាមេរិក និងម៉ិកស៊ិក នឹងជួបគ្នានៅសប្តាហ៍នេះក្នុងទីក្រុងម៉ិកស៊ីកូ ដើម្បីចាប់ផ្តើមការចរចាផ្លូវការលើច្បាប់ប្រភពដើម (rules of origin) និងសន្តិសុខសេដ្ឋកិច្ច។ លោក Greer បាននិយាយថា គាត់ចង់ឲ្យឱនភាពពាណិជ្ជកម្មរបស់អាមេរិកជាមួយម៉ិកស៊ិកថយចុះ ហើយឲ្យម៉ិកស៊ិកបង្កើនពន្ធលើទំនិញនាំចូលពីក្រៅអាមេរិកខាងជើង។ ទោះបីឱនភាពពាណិជ្ជកម្មទំនិញសរុបរបស់អាមេរិកបានធ្លាក់ចុះជាង 30% កាលពីឆ្នាំមុន មកនៅ 196.9 ពាន់លានដុល្លារ។
ការផ្លាស់ប្តូរច្បាប់ប្រភពដើម ដែលប៉ះពាល់ខ្លាំងដល់វិស័យយានយន្ត និងឧស្សាហកម្ម នឹងមានគោលបំណងលើកទឹកចិត្តឲ្យផលិតកម្មកាន់តែច្រើនកើតឡើងនៅសហរដ្ឋអាមេរិក។

លោក Greer បាននិយាយថា៖
“ក្នុងអំឡុងការចរចាទាំងនេះ យើងនឹងពិភាក្សាអំពីច្បាប់ប្រភពដើម ដើម្បីបង្កើនមាតិកាផលិតនៅអាមេរិកក្នុងទំនិញទាំងនេះ។”
លោកក៏បានបន្ថែមថា ប្រសិនបើម៉ិកស៊ិក និងប្រទេសផ្សេងៗក្នុងតំបន់ អាចយល់ព្រមបង្កើនពន្ធលើទំនិញពីខាងក្រៅ
នោះវានឹងធ្វើឲ្យងាយស្រួលក្នុងការផ្តល់អត្ថប្រយោជន៍ពន្ធពិសេសដល់ដៃគូក្នុងតំបន់។ “នៅចុងក្រោយ សម្រាប់ហេតុផលសន្តិសុខជាតិ ខ្ញុំចង់ឲ្យខ្សែសង្វាក់ផ្គត់ផ្គង់របស់យើង មកពីតំបន់នេះផ្ទាល់ ពោលគឺអាមេរិកខាងជើង។”

អត្ថបទដោយ៖ ហ៊ុន នេត្រា
Telegram: 078444061
ថ្ងៃខែឆ្នាំ៖ 27 ឧសភា 2026
ប្រភព៖ Reuter