• តម្លៃប្រេង Brent កើនឡើង បន្ទាប់ពីការវាយប្រហារយោធារបស់អាមេរិកលើអ៊ីរ៉ង់
• លោក Rubio និយាយថា កិច្ចព្រមព្រៀងជាមួយអ៊ីរ៉ង់អាចចំណាយពេលប៉ុន្មានថ្ងៃ
• UBS កាត់បន្ថយគោលដៅតម្លៃមាសចុងឆ្នាំចុះ 5,500

ថ្ងៃទី 26 ខែឧសភា (Reuters) — តម្លៃមាសបានធ្លាក់ចុះនៅថ្ងៃអង្គារ ដោយសារការព្រួយបារម្ភអំពីអតិផរណាខ្ពស់
បន្ទាប់ពីភាពតានតឹងឡើងវិញរវាងសហរដ្ឋអាមេរិក និងអ៊ីរ៉ង់ បានជំរុញឲ្យតម្លៃប្រេង Brent កើនឡើង និងធ្វើឲ្យទស្សនវិស័យអត្រាការប្រាក់របស់អាមេរិកកាន់តែមិនច្បាស់លាស់។ មាស Spot បានធ្លាក់ចុះ 1.1% មកនៅ 4,522.50។
អ្នកវិភាគ Ricardo Evangelista របស់ ActivTrades បាននិយាយថា៖
“ភាពមិនច្បាស់លាស់នេះបានជំរុញឲ្យតម្លៃប្រេងកើនឡើង ដែលបង្កើនការព្រួយបារម្ភអំពីអតិផរណា និងពង្រឹងការរំពឹងថា ធនាគារកណ្ដាលអាមេរិក (Fed) នឹងប្រកាន់ជំហរតឹងរ៉ឹងបន្ថែមទៀត ដែលក្លាយជាសម្ពាធអវិជ្ជមានលើមាសដែលមិនផ្តល់ផលចំណេញ (non-yielding gold)។” 
លោកបន្តថា៖ “ទិសដៅដែលងាយកើតឡើងបំផុតសម្រាប់តម្លៃមាសនៅពេលនេះ គឺបន្តធ្លាក់ចុះ… ពាណិជ្ជករនឹងផ្តោតលើកិច្ចពិភាក្សារវាងអាមេរិក និងអ៊ីរ៉ង់ ខណៈក៏រង់ចាំទិន្នន័យអតិផរណា PCE របស់អាមេរិកផងដែរ។”

តម្លៃប្រេង Brent បានកើនឡើងខ្លាំង បន្ទាប់ពីយោធាអាមេរិកបានវាយប្រហារនៅក្នុងអ៊ីរ៉ង់ ដែលបានបន្ថយក្តីសង្ឃឹមថា
ជម្លោះនៅមជ្ឈិមបូព៌ានឹងអាចដោះស្រាយបានឆាប់រហ័ស។ រដ្ឋមន្ត្រីការបរទេសអាមេរិក លោក Marco Rubio បាននិយាយនៅថ្ងៃអង្គារថា ការចរចាកិច្ចព្រមព្រៀងជាមួយអ៊ីរ៉ង់ អាច “ចំណាយពេលប៉ុន្មានថ្ងៃ”។

តម្លៃប្រេងឆៅខ្ពស់ អាចជំរុញអតិផរណា និងធ្វើឲ្យអត្រាការប្រាក់នៅកម្រិតខ្ពស់យូរជាងមុន។ ទោះបីមាសត្រូវបានចាត់ទុកថាជាទ្រព្យការពារអតិផរណាក៏ដោយ ប៉ុន្តែអត្រាការប្រាក់ខ្ពស់ជាទូទៅ នឹងដាក់សម្ពាធលើមាស ដែលមិនផ្តល់ផលចំណេញ។

ទីផ្សារកំពុងវាយតម្លៃថា Fed អាចដំឡើងអត្រាការប្រាក់ម្តងទៀតមុនចុងឆ្នាំ ដោយមានប្រហែល 41% សម្រាប់ការដំឡើង 25 basis points នៅខែធ្នូ នេះបើយោងតាមឧបករណ៍ FedWatch របស់ CME Group។
 
វិនិយោគិនកំពុងរង់ចាំទិន្នន័យ Personal Consumption Expenditures (PCE) របស់អាមេរិកសម្រាប់ខែមេសា
ដែលនឹងចេញផ្សាយនៅថ្ងៃព្រហស្បតិ៍ ដើម្បីស្វែងរកសញ្ញាបន្ថែមអំពីគោលនយោបាយរូបិយវត្ថុរបស់អាមេរិក។

ក្នុងពេលជាមួយគ្នា UBS បានកាត់បន្ថយគោលដៅតម្លៃមាសចុងឆ្នាំរបស់ខ្លួនចុះ 5,500 ដោយសារហានិភ័យបន្តពីអត្រាផលទុន (yield) និងប្រាក់ដុល្លារខ្ពស់។
ទោះជាយ៉ាងណា UBS បានបញ្ជាក់ថា៖
“បំណុលសកលខ្ពស់ ការខ្វះខាតថវិកាបន្តរបស់អាមេរិក និងនិន្នាការបន្តនៃការបំបែកទុនបម្រុង (reserve diversification) នឹងនៅតែគាំទ្រដល់ទ្រព្យរឹង (hard assets) ជាពិសេសនៅពេលតម្លៃប្រេងអាចធ្លាក់ស្រាលវិញនៅចុងឆ្នាំ។”

អត្ថបទដោយ៖ ហ៊ុន នេត្រា
Telegram: 078444061
ថ្ងៃខែឆ្នាំ៖ 26 ឧសភា 2026
ប្រភព៖ Reuter