ឌូបៃ, (Reuters) – រដ្ឋមន្ត្រីការបរទេសអ៊ីរ៉ង់ បានចោទប្រកាន់សហព័ន្ធអេមីរ៉ាតអារ៉ាប់រួម (UAE) ថា បានចូលរួមដោយផ្ទាល់ក្នុងប្រតិបត្តិការយោធាប្រឆាំងនឹងប្រទេសរបស់ខ្លួន ក្នុងអំឡុងកិច្ចប្រជុំរដ្ឋមន្ត្រីការបរទេសនៃក្រុម BRICS។

ការប៉ះទង្គិចពាក្យសម្ដីនេះ បានកើតឡើងមួយថ្ងៃបន្ទាប់ពី UAE បានបដិសេធសេចក្តីថ្លែងការណ៍របស់នាយករដ្ឋមន្ត្រីអ៊ីស្រាអែល
Benjamin Netanyahu ដែលបាននិយាយថា លោកបានទៅទស្សនកិច្ចប្រទេសនៅតំបន់ឈូងសមុទ្រនោះ ក្នុងអំឡុងសង្គ្រាមអ៊ីរ៉ង់។  ចំពោះរឿងនេះ រដ្ឋមន្ត្រីការបរទេសអ៊ីរ៉ង់ Abbas Araghchi បានឆ្លើយតបរួចហើយ ដោយនិយាយថា៖

«អ្នកដែលសហការជាមួយអ៊ីស្រាអែល ដើម្បីបង្កភាពបែកបាក់ នឹងត្រូវទទួលខុសត្រូវចំពោះទង្វើរបស់ខ្លួន»។

«ខ្ញុំមិនបានបញ្ជាក់ឈ្មោះ UAE នៅក្នុងសេចក្តីថ្លែងការណ៍របស់ខ្ញុំនៅក្នុងកិច្ចប្រជុំ (BRICS) ទេ ដើម្បីរក្សាឯកភាព។ ប៉ុន្តែការពិតគឺ UAE បានចូលរួមដោយផ្ទាល់ក្នុងការឈ្លានពានប្រឆាំងនឹងប្រទេសរបស់ខ្ញុំ។ នៅពេលការវាយប្រហារចាប់ផ្តើម ពួកគេមិនទាំងបានចេញសេចក្តីថ្កោលទោសផង»។ នេះជាសម្តីរបស់រដ្ឋមន្ត្រីការបរទេសអ៊ីរ៉ង់ Abbas Araghchi ដែលត្រូវបានសារព័ត៌មានរដ្ឋអ៊ីរ៉ង់ដកស្រង់កាលពីថ្ងៃព្រហស្បតិ៍ ជាការឆ្លើយតបទៅនឹងមតិយោបល់របស់តំណាងអេមីរ៉ាត។ សារព័ត៌មានរដ្ឋអ៊ីរ៉ង់មិនបានបញ្ជាក់ថា តំណាងអេមីរ៉ាតបាននិយាយអ្វីខ្លះនោះទេ។

យោងតាមសេចក្តីរាយការណ៍ លោក អារ៉ាក់ជី (Araqchi) បានអះអាងថា មូលដ្ឋានទ័ពអាមេរិក និងសម្ព័ន្ធភាពជាមួយអ៊ីស្រាអែល មិនបានផ្តល់សន្តិសុខដល់ United Arab Emirates ទេ ហើយប្រទេសនេះគួរតែពិចារណាឡើងវិញអំពីគោលនយោបាយរបស់ខ្លួនចំពោះ Iran។

 «យើងត្រូវរស់នៅក្បែរគ្នាដោយសន្តិភាព ហើយនេះតម្រូវឱ្យមានទំនាក់ទំនងដោយសន្តិវិធី និងការយល់ច្បាស់ពេញលេញរវាងប្រទេសទាំងពីរ» លោក អារ៉ាក់ជី បានបន្ថែម។

សង្គ្រាមជាមួយ Iran បានចាប់ផ្តើមនៅថ្ងៃទី 28 ខែកុម្ភៈ ដោយការវាយប្រហាររបស់សហរដ្ឋអាមេរិក និង Israel លើអ៊ីរ៉ង់ ខណៈដែលទីក្រុង Tehran បានឆ្លើយតបដោយបាញ់មីស៊ីល និងយន្តហោះដ្រូនទៅកាន់មូលដ្ឋានទ័ពអាមេរិក និងគោលដៅផ្សេងៗនៅក្នុងបណ្តាប្រទេស។

អត្ថបទដោយ៖ ហ៊ុន នេត្រា
Telegram: 078444061
ថ្ងៃខែឆ្នាំ៖ 15 ឧសភា 2026
ប្រភព៖ Reuter